LOLONGOK KA CANDI BOJONG MÉNJÉ
“SITUS CANDI BOJONGMENJE. BALAI
PENGELOLAAN KEPURBAKALAAN JARAHNITRA DISBUDPAR JAWA BARAT”. Kitu aksara nu
kaungel dina plang saméméh léngkah anjog ka candi nu rék dijugjug. Éta plang nu
katémbong karahaan di beulah luhur jeung handapna téh weweg nangtung di sisi
jalan nu teu kendat gumuruh ku lalar liwatna kandaraan.
Candi Bojong Ménjé perenahna mah di Kampung
Bojong Ménjé RT 03 RW 02, Désa Cangkuang, Kecamatan Rancaékék, Kabupatén Bandung.
Kurang leuwih aya dina 698 m luhureun beungeut cai laut. Ti puseur dayeuh Kota
Bandung mah aya kana 24 km, laju ngétan mapay Jalan Raya Rancaékék nu
nepungkeun Kota Bandung jeung Garut-Tasikmalaya-Ciamis. Mun jolna ti Kota
Bandung, di beulah katuhu éta plang bakal natrat katempo. Ti éta plang,
kira-kira 200 m urang bakal anjog ka Candi Bojong Ménjé, sanggeus mapay
lulurung gang nu di kénca-katuhueunana méh pasesedek ku padumukan masarakat.
Sajarah
Kapanggihna
Ngeunaan sajarah kapanggihna Candi Bojong Ménjé,
Rochman (74) nu jadi juru piara candi, nétélakeun dina taun 1977 manéhna mimiti
datang ka Kampung Bojong Ménjé, Désa Cangkuang, Kecamatan Rancaékék, minangka
warga anyar. Harita geus ibur béja yén di Kampung Bojong Ménjé aya
patilasan
sajarah nu mangrupa candi. Tanggal 18 Agustus 2002, Rochman, Ahmad Muhammad,
jeung warga nu séjénna ngaruang taneuh keur kaperluan melak palawija. Sabot
kitu, dina jero taneuh kapanggih tutumpukan batu nu persis wangunan candi. Éta
kajadian téh tuluy dilaporkeun ka pamaréntah. Ku ayana éta laporan, tanggal 20
Agustus 2002 tim ti Balai Arkeologi Bandung, Disbudpar Jawa Barat, Balai
Pengawasan Kepurbakalaan, Kesejarahan, dan Nilai-Nilai Tradisional Jawa Barat,
sarta Pusat Perlindungan Purbakala PSP Serang, laju ngayakeun panalungtikan ka
éta tempat. Nya kapanggih baé éta tutumpukan batu candi téh. Éta Candi Bojong Ménjé dipaparah geus
diadegkeun ti abad 7 Maséhi. Lantaran perenahna aya di Kampung Bojong Ménjé,
éta candi téh dingaranan Candi Bojong Ménjé. Tepi ka ayeuna Candi Bojong Ménjé
téh terus dibebenah.
Sanggeus anjog ka Candi Bojong Ménjé,
kasampak lokasi situs nu dikuriling ku témbok pabrik tékstil nu ngajungkiring
katuhueun lokasi situs. Di beulah kénca ngadeg wangunan paranti neundeun
sesemplékan batu candi, jeung hiji wangunan saung. Saenyana taneuh éta candi
téh kungsi aya di tengah makam masarakat. Tapi kiwari éta makam téh geus
dipindahkeun.
Mun saméméhna urang boga sangkaan yén
Candi Bojong Ménjé téh mangrupa candi nu lengkep tur badag cara Candi Cangkuang
atawa Candi Borobudur, éta sangkaan téh bakal misleuk mangsa urang ningali
Candi Bojong Ménjé sacara langsung. Tuda rék teu kitu kumaha, kapan saliwatan
mah nu kasampak di dinya téh ukur tutumpukan batu wungkul. Sok sanajan ceuk
juru piarana, sababaraha batu candi kungsi aya nu diiwat ku masarakat pikeun
rupa-rupa kaperluan, saperti keur batu asahan, batu nu lémpar dipaké keur
nyeuseuh, jsb. Tapi sawaréhna mah geus hasil disusun jadi pondasi jeung suku
candi. Ari batu pikeun nyusun awak jeung hateupna mah can kapanggih.
Di Candi Bojong Ménjé, urang moal
manggih kuncén nu tedak-tumedak cara di tempat nu séjén. Di dinya mah disebutna
téh juru piara. Ayeuna nu jadi juru piara di éta candi téh, nyaéta Dadan (46),
jeung Rochman (74). Ceuk katerangan Dadan, di éta tempat téh aya opat situs,
turta diadegkeun kira-kira dina abad 7-8 Maséhi. Malah kungsi aya nu nyebutkeun
yén éta candi téh umurna leuwih kolot manan Candi Borobudur. Demi nu katémbong
panggedéna mah, nyaéta candi geus kapanggih batu pondasi jeung sukuna téa. Dumasar
kana panalungtikan Balai Arkéologi Bandung, Dinas Kebudayaan dan Pariwisata
Kabupatén Bandung, jeung Dinas Kebudayaan dan Pariwisata Jawa Barat, éta
susunan batu candi téh ngujur ngalér-ngidul nu panjangna 4 m, disusun ku 9
balok batu kalawan 5 lapisan batu. Anapon ukuran pondasi candina mah 7,67 m x 7,47 m, turta luhureunana aya suku
candi nu ukuranana 6,40 m x 6,77 m.
Teu jauh ti dinya, ukur sababaraha méter
ti éta candi katangén candi nu kadua, nyaéta nu katelah Candi Orok. Ceuk katerangan,
di éta tempat téh mémang aya dua candi. Arca nu kahiji, nyaéta arca lalaki nu
leungeun kéncana ngaragap dada, sedeng leungeun katuhuna nyenyekel pedang. Arca
nu kadua, nyaéta mangrupa arca awéwé nu keur nanangkeup orok. Ku kituna, kiwari
éta candi téh katelah Candi Orok. Ngan
hanjakal, ceuk juru piara candi éta dua arca téh can kapanggih.
Candi nu katilu, nyaéta Candi Kukuk. Nu
jadi ciri éta candi, nyaéta diwatesan ku dapuran awi surat nu jumlahna lima
tangkal. Ngan hanjakal éta candi téh can kapanggih, teu béda ti Candi Orok.
Demi candi nu kaopat, katelah Candi
Wayang. Perenahna 120 méter ti ti Candi
Orok. Tapi éta candi téh nasibna ngabuntut bangkong, sabab panalungtikanana teu
dituluykeun.
Salian ti candi, di sabudeureun éta
tempat ogé aya cai nu ngeuyeumbeu méh ngurilingan candi. Ku masarakat di dinya
mah éta cai téh disebut situ. Diantarana baé, di sabudeureun Candi Orok aya cai
nu ngeyembeng, nu katelah Situ Silulumpang. Dingaranan Situ Silulumpang sotéh
pédah baé wangunna ngaharib-harib kana lulumpang.
Kira-kira 150 méter ti Situ Silulumpang,
aya Situ Legok Rampa. Nelah Situ Legok Rampa téh sabab mun ngala lauk di éta
situ mah teu bisa ku kecrik, lantaran bakal tikait kana rungga atawa tutuwuhan
nu aya dina jero cai, ku kituna ngala lauk di éta situ mah kudu dirarampa ku
leungeun.
Situ nu katilu, nyaéta Situ Ranca
Malaka. Éta situ leuwih lega manan situ-situ nu séjénna, dikuriling ku makam,
turta di sabudeureunana rajeg tangkal malaka, ku kituna dilandi Situ Ranca
Malaka.
Mitos
Ngadegna candi di Kampung Bojong
Ménjé téh teu anggang tina mitos atawa carita nu sumebar di masarakat
sabudeureunana. Ceuk katerangan, baheula di sabudeureun Candi Bojong Ménjé
kungsi aya hiji tempat anu mangrupa taneuh kosong, nu ku masarakat di dinya
dingaranan Tangsi. Di sabudeureunana
tumuwuh sababaraha tatangkalan kahot, kayaning caringin, kiara, jeung kawung. Éta tempat téh minangka tempat karamat
keur masarakat di dinya mah. Salian ti tatangkalan, ogé aya dua makam heubeul,
tapi teu kapaluruh makam saha, da taya tulisan ngaranna. Tapi aya sawatara
masarakat nu nyebutkeun yén éta téh makam Embah Raksa Dipa atawa Embah Raksa
Cakra Nangara. Sedeng makam gigireunana mah makam Nyimas Ayu Raksa Inten.
Mitos nu séjénna, nyaéta ayana di
Candi Kukuk nu diwates ku dapuran awi surat. Ceuk sakaol, awi dina sadapuran
téh jumlahna jejeg lima tangkal baé, tara kurang tara leuwih. Mun pareng aya nu
nuar satangkal, bakal tumuwuh deui satangkal. Pon kitu deui mun dituar dua
tangkal, bakal tumuwuh deui dua tangkal. Jumlah tangkal nu tumuwuh bakal sarua
jeung jumlah tangkal nu dituar.
Ketak
Pamaréntah
Juru piara candi, Dadan ngajéntrékeun
deui yén pamaréntah kiwari geus aya tarékah pikeun ngadeudeul kamajuan panalungtikan
Candi Bojong Ménjé. Contona baé, pamaréntah geus mantuan dina sual “pembebasan
tanah” di tempat ngadegna Candi Bojong Ménjé.
Ku kapanggihna Candi Bojong Ménjé,
katerangan yén di tatar Sunda mah arang ku bukti-bukti artéfak téh muga bisa
kajawab, turta sing jadi lawang pikeun lajuning laku ngungkab bukti-bukti
artéfak sajarah séjénna. Tangtuna baé sagala rupa pangrojong, boh ti pamaréntah
boh ti masarakat dipiharep teu eureun ukur semet dinya, tapi sing terus mayeng
ngagelenggeng, geusan langgengna bukti sajarah di tatar Sunda.
***
Nu nulis,
Mahasiswa
Jurusan Pendidikan Bahasa Daerah UPI
Tidak ada komentar:
Posting Komentar