PANCAROBA
Pancaroba
atawa mangsa bagantina usum nu maneuh jeroning sataun—boh ti halodo ka
ngijih, boh ti ngijih ka halodo—, mangrupa tangara alam pikeun tuduh
manusa nu kudu disurahan enggoning ngalokonan hirup jeung huripna.
Hususna, pikeun juru tani dina mitembeyan melak jeung mupu hasil
tatanén. Bari matéakeun tarékah anyar kumaha carana ningkatkeun produksi
pepelakan dina nadah hujan atawa nyorang halodo panjang.
Malah,
kapan pancaroba gé jadi tuduh hurip waras, ku réana panyakit nu nerekab
lantaran robahna kaayaan iklim jeung cuaca dina ieu usum. Remen
diémbarkeun sangkan masarakat tatan-tatan tur waspada dina
nyanghareupanana. Cicirén yén manusa sagalarupana gumantung ka alam.
Ngindung ka ususm, mibapa ka mangsa.
Wujudiah séjén ladang
nyurahan alam téh antarana ngajanggélék jadi média itungan pananggalan
atawa kalénder—urang Sunda boga Kala Sunda—nu ti taun ka taun marengan
kalawan sumebar (folklore) sacara lisan jeung tulisan. Fungsi
Kala Sunda, lian ti malintangan (astrologi) dina ngahuma, melak paré
sawah, malawija, tur jengkar ngala lauk ka laut, ogé pikeun sawatara
masarakat adat mah dipaké babon dina marekkeun rejeki jeung ngajauhkeun
balai.
Éstu jadi métodeu horoskop nu nangtukeun untung
jeung sué. Boh dipaké pikeun indit-inditan boh pikeun tujuman repokna
jodo. Di Kanékés, Baduy, aya nu disebut ‘Kolénjér’ (pananggalan pikeun
nangtukeun naptu tanggal/ngitung bulan, naptu poé, jeung naptu
wanci/ngitung papasingan waktu jero sapeuting) jeung ‘Sastra’
(pananggalan nu patalina jeung tujuman jodo).
Kaarifan
Nurutkeun
Kala Sunda, dina sawarsih/sataun dibagi jadi 4 usum, nyaéta ngijih,
dangdangrat/dangdarat, halodo/katiga, jeung labuh/mamaréng. Nu kaasup
kana pancaroba nyaéta dangdangrat jeung labuh. Nurutkeun Kamus R.A.
Danadibrata (2006), dangdangrat téh usum panyelang antara usum hujan ka
halodo, atawa hujan jeung halodo kakapeungan. Sabalikna, labuh mah usum
panyelang antara halodo ka hujan—di sawatara wewengkon istilah labuh
dipaké pikeun sesebutan usum ngagarap sawah.
Dina ‘Pranata
Mangsa’ (péréléan ngaran usum-usuman jeroning sataun, aya 12 ngaran
usum, tur séwang-séwang boga itungan nu tangtu), dangdangrat umurna 87
poé (26 Maret-21 Juni) ti mimiti posisi panonpoé aya puseuring garis
khatulistiwa dina posisi 0º, laju bagerak ngalér nepi ka posisi 23,5º LU
(Lintang Utara).
Dangdangrat ngawengku 3 usum, kahiji, Kasadasa (kasapuluh) lilana 23 poé (26 Maret-17 April). Cirina, angin tarik ngagelebug datangna ti wétan kidul (tenggara),
sato meujeuhna rareuneuh, manuk récét nyarieun sayang. Méré tangara ka
juru tani, di pagunungan huma sawaréh geus meujeuhna dipanén, di sawah
nu subur cai mimiti tebar, jeung di kebon tatan-tatan malawija.
Kadua, Desta
(kasawelas) lilana 23 poé (18 April-10 Méi). Cirina, hawa karasa garing
bayeungyang, angin angger ngagelebug, manuk geus baranahan, hama
kungkang mimiti ngaruksak pepelakan, sarta tatangkalan ngarangrangan.
Tangara meumeujeuhna sibuk tandur jeung malawija.
Jeung katilu, Sada (kaduawelas)
lilana 41 poé (11 Méi-21 Juni). Cirina, mimiti usum halodo, angin
ngahiur ti wétan, peuting nepi ka isuk-isuk tiris sedeng beurang hawa
karasa nyongkab, taneuh ngebul, dangdaunan lalayu, datang hama paré,
loba panyakit (sasalad), sarta watek jalma babari napsu. Tangara, keur
usum rumpak jami, sawaréh juru tani ngampihkeun paré hasil dibuat ka
leuitna.
Sedeng labuh umurna 52 poé (17 Séptémber-17 Oktober). Ngawengku 2 usum, nyaéta Kapat
(Kaopat) lilana 25 poé (17 Séptémber-11 Oktober). Cirina, angin
datangna ti kulon ngahiur muter nimbulkeun hujan, mimiti kadéngé sora
gugur, sasatoan balegér, lauk di walungan kalaluar/liar ti liang-liang
leuwi, randu buahan, gadung mimiti nyareng, sarta hadé pikeun melak cau.
Tangara, juru tani mimiti ngagarap sawah deui, tur biasana réa nu
katerap nyeri beuteung jeung utah-utahan.
Jeung Kalima lilana 27 poé (12 Otober-7 Nopémber). Cirina, angin ngahiur tarik datangna ti kalér kulon (barat laut)
bareng jeung hujan, ari hujan datangna isuk-isuk atawa soré,
tatangkalan réa nu raruntuh, siraru mimiti kalaluar tina hunyurna,
bungbuahan karolot, bongborasan jaradi, asem pucukan, konéng ngadaun
ngora, oray jeung ulam barijil, sarta béntang wuluku katémbong
soré-soré. Tangara, mimiti suhud ngurus huma, sawah mimiti tebar, tur
sawaréh aya nu geus ditanduran.
Hal ieu nunjukkeun yén
pancaroba boga kalungguhan penting dina kahirupan masarakat/juru tani.
Mungguh ngagantungkeun hirup tina ladang nyurahan usum jeung meureut
cikésang. Kitu ogé Kala Sunda jadi adeg-adeg ketahanan pangan. Minangka kaarifan lokal diversifikasi pangan, luyu jeung robahna usum.
Najan sistem pertanian geus modéren ku ayana bibit anyar nu bisa dipanén 3 kali dina sataun (tekno-ekonomis), tur ngandelkeun canggihna élmu prakiraan cuaca
katut isu robahna iklim, Kala Sunda tetep bisa maréngan rénghap juru
tani. Lian ti méré babon waktu melak jeung manén, tapi ogé jadi
palasipah adaptasi sawirahma jeung alam. Kitu ogé mun panceg mageuhan
pamadegan dalit jeung alam.
Kaayaan Kiwari
Tapi,
naha kiwari manusa masih kénéh misobat alam? Atawa boga tanggung jawab
pikeun ngaraksa-ngariksa lingkunganna? Kitu deui Kala Sunda masih jadi
babon lalakon malintangan? Galagat usum nu geus teu tangtu, munculna
rupaning kajadian alam (kaasup cuaca ekstrim), murbana ‘pemanasan global’ (global warming),
mahabuna wabah panyakit, poharana nu gagal panén, nerekabna sawatara
sato ngaranjah padumukan lantaran réa lahan nu alih fungsi, sarta
geunjleungna isu paceklik (rawan pangan), saniskara tangara yén manusa
geus teu miduli alamna.
Pancaroba geus teu bisa
ditangtukeun ku itungan kalénder. Usum teu puguh datangna. Iklim jeung
cuaca terus robah. Alam bangun nu murka. Pamustunganna, lahan ruksak,
cai béak, tur pangeusina balangsak. Wuri-wuri ngahontal pangwangunan
dinamis, kalah katalanjuran alih fungsi lahan. Wuwuh nyontang lahan
produktif pertanian.
Lian ti éta, teu saimbangna antara
harga gemuk/ubar tatanén jeung harga béas, katut robahna pamadegan juru
tani nu réa pindah pacabakan, jadi pasualan nu parna saban taunna. Juru
tani gé nu méméhna farmers (juru tani nu boga tur ngagarap lahan sawah sorangan) robah ka peasant (buruh tani/petani gurem). Nu cenah nagara Lumbung Padi téh, kalah haben ngimpor béas pikeun nyukupan kabutuh pangan nasional.
Satemenna,
réa tarékah pikeun ngungkulan ieu pasualan. Antarana, ningkatkeun
produktifitas paré ku cara inténsifikasi tur éksténsifikasi, ngajaga
sumber cai (irigasi), jeung nguatan budaya tani sangkan teu pindah
pileumpangan. Tangtuna, pamaréntah kudu jadi séntral, méré kontrol
ngaliwatan kawijakanana. Pangwangunan teu salah kaprah, lahan tatanén
tetep kagarap. Atuh, ka hareupna cita-cita ngahontal swasembada pangan
téh teu saukur lalambé.
Galagat usum nu terus robah kudu
disurahan kalawan jembar. Kala Sunda baris bisa marengan minangka
warisan budaya, dina nyorang leunjeuran usum ku katiginan. Pancaroba teu
saukur dihartikeun bagantina usum baé, tapi disurahan minangka tangara
kudu pindahna paripolah manusa sangkan nyaah tur teu ngalalaworakeun
alamna. Dibarengan ku ajén budaya, atikan, sarta harmonisasi politik.
Dimuat dina Cupumanik No.106, Mei 2012
Tidak ada komentar:
Posting Komentar